საერთაშორისო ტრანზიტის ფასების მკვეთრი ზრდის მიზეზი გლობალური ლოგისტიკური კრიზისია, რომლის შედეგადაც აზიიდან ევროპასა და აშშ-ში სატრანსპორტო გადაზიდვების ფასი გასამმაგებულია.

გადაზიდვების საერთაშორისო ფასებს მუდმივ რეჟიმში აკვირდება ბრიტანული საკონსულტაციო ორგანიზაცია Drewry-ი, რომლის მიხედვითაც, სტანდარტული კონტეინერის ინდექსი ამჟამად 9,669 დოლარს შეადგენს, რაც წინა წელთან შედარებით 276%-ით მეტია.

ყველაზე მოთხოვნადი მიმართულებების მიხედვით, კონტეინერების ტრანსპორტირების ფასები ასე ნაწილდება:

● შანხაი - როტერდამი - $10,062 დოლარი, მატება წინა წელთან 543%;
● როტერდამი - შანხაი - $1,591 დოლარი, მატება წინა წელთან 45%;
● შანხაი - ლოს ანჯელესი - $10,976 დოლარი, მატება წინა წელთან 172%;
● ლოს ანჯელესი - შანხაი - $1,302 დოლარი, მატება წინა წელთან 151%;

როგორც ცნობილია, ფასების მკვეთრი ზრდა ქართულ პორტებამდე კონტეინერების გადაზიდვებსაც შეეხო.

Maersk-ის დირექტორის სორენ სკოუს განმარტებით, კრიზისულ ვითარებას მკვეთრად გაზრდილი მოთხოვნა იწვევს. “საკონტეინერო გადაზიდვებზე ისტორიულად მაღალი ფასების მიზეზია მკვეთრად გაზრდილი მოთხოვნა, რომელსაც ამჟამად არსებული გადაზიდვების მასშტაბი ვერ პასუხობს".

2021 წლის იანვარ-აგვისტოში საქართველოს პორტებმა 271,000 კონტეინერი მიიღეს, რაც წინა წელთან შედარებით 20%-ით ნაკლებია. გაძვირებული ლოგისტიკა ქვეყანაში საქონელზე ფასების ზრდის ერთ-ერთი მიზეზია.