ყაზახეთი ბათუმი-ფოთის პორტებზე გამავალ ტრანსკასპიურ საერთაშორისო სატრანსპორტო მარშრუტს შორეულ ბრაზილიასთან ვაჭრობისთვისაც კი ყველაზე ოპტიმალურ ლოგისტიკურ გადაწყვეტად მიიჩნევს. ამის შესახებ ყაზახეთის სააქციო საზოგადოება QazTrade-ის გენერალურმა დირექტორმა, აზამატ ასკარულიმ სან პაულოში, ყაზახეთ-ბრაზილიის სავაჭრო და საინვესტიციო ფორუმზე განაცხადა. ინფორმაციას სააგენტო Trend ყაზახეთის ვაჭრობისა და ინტეგრაციის სამინისტროზე დაყრდნობით ავრცელებს.

აღსანიშნავია, რომ არსებულ გეოპილიტიკურ ვითარებაში სამხრეთ და ჩრდილოეთ ამერიკის ქვეყნებთან, ევროკავშირსა და აფრიკასთან ორმხრივი ვაჭრობისთვის, ტრანსკასპიური საერთაშორისო სატრანსპორტო მარშრუტის განვითარება პრიორიტეტულია. ყაზახეთსა და ბრაზილიას შორის დიდი მანძილის მიუხედავად, დღეს საქონლის მიწოდებისთვის როგორც მულტიმოდალური, ასევე, საჰაერო ტრანსპორტით, ბევრი ლოგისტიკური მარშრუტი არსებობს, თუმცა ტრანსკასპიური მარშრუტით გადაზიდვას ყველაზე ნაკლები დრო სჭირდება.

სანტოსის პორტიდან ალმაათამდე საქონლის ტრანსპორტირებას ტრანსკასპიურ საერთაშორისო სატრანსპორტო დერეფნითა და შავი ზღვის, ფოთისა და ბათუმის პორტების გამოყენებით, საშუალოდ, 55 დღე სჭირდება, მაშინ, როცა ანალოგიური დროა საჭირო უფრო შორი, ბალტიის ქვეყნების პორტებიდან, ხოლო ჩინეთის პორტებიდან ტვირთის მიწოდებას 65-70 დღე დასჭირდება.