პამდემიამ გლობალურ ვაჭრობაზე დიდი გავლენა იქონია. მიწოდების ჯაჭვის შეფერხებამ საერთაშორისო გადაზიდვების კრიზისი გამოიწვია, გაჩნდა კონტეინერების დეფიციტი და გაიზარდა ტრანსპორტირების ფასები. ამ ეტაპზე ტვირთის გადაზიდვის ხარჯები ნორმალურ მაჩვენებელთან შედარებით 4-ჯერ მეტია, რაც საფრთხეს უქმნის ბიზნესის სტაბილურობას, რომელიც სწორედ სავაჭრო სატრანსპორტო ხაზებზეა დამოკიდებული.
როგორც უცხოური გამოცემები იუწყებიან, 40-ფუტიანი კონტეინერის ფასი აზიიდან ჩრდილოეთ ევროპაში 2,000 აშშ დოლარიდან 9,000 აშშ დოლარამდე გაიზარდა, ხოლო CNBC-ის ცნობით, აზიიდან ამერიკის დასავლეთ სანაპიროზე გადაზიდული ტვირთის ღირებულება 145 პროცენტით გაიზარდა.
ამ პრობლემის ერთ-ერთი მთავარი გამომწვევი მიზეზი პანდემიის ფონზე ჩინეთის ეკონომიკის სწრაფი აღდგენაა, რამაც ტვირთზე მოთხოვნა გაზარდა და კონტეინერების დეფიციტი გამოიწვია, შესაბამისად გაიზარდა ფასებიც. მიუხედავად იმისა, რომ ჩინეთმა ეკონომიკის სწრაფი აღდგენა მოახერხა, მას არ აქვს საკმარისი კონტეინერების რაოდენობა რომ მოთხოვნა დააკმაყოფილოს.
ცნობილია, რომ მსოფლიოში 170 მილიონზე მეტი სატვირთო კონტეინერია, რომელიც მსოფლიოს ტვირთის 90%-ის გადასატანად გამოიყენება.
ამასთანავე აღსანიშნავია, რომ პანდემიამ დიდი გავლენა იქონია საერთაშორისო გადამზიდავ ხაზებზე. სამუშაო ძალის დეფიციტის, გადატვირთული პორტებისა და კარანტინში მყოფი ტვირთების გამო შეფერხდა და გახანრძლივდა ტვირთის ტრანსპორტირების ვადები.
