საქართველოს ეკონომიკისა და მდგრადი განვითარების სამინისტრო, ეროვნული ბანკი, „აწარმოე საქართველოში“ და საკონსულტაციო კომპანია „გალტ ენდ თაგარტი“ იმპორტის ჩამნაცვლებელი ადგილობრივი წარმოებების პოტენციალის განსასაზღვრად კვლევას აწარმოებენ.
„კორონავირუსის გლობალურმა გამოწვევამ ნათლად დაანახა მსოფლიოს, რომ უფრო მეტი აქცენტი უნდა გაკეთდეს საკუთარ წარმოებასა და საკუთარი ბაზრების უზრუნველყოფაზე კრიტიკული, მნიშვნელოვანი პროდუქციით. ამ თვალსაზრისით არც საქართველოა გამონაკლისი - ჩვენ დავალება გვაქვს და ვმუშაობთ სპეციალურ კვლევაზე, რომ უახლოეს პერიოდში გამოვყოთ ის დარგები და ის წარმოებები, რომლებიც საჭიროებენ მხარდაჭერას, განვითარებას და რომლებიც პერსპექტიულია იმპორტთან კონკურენციის თვალსაზრისით“, - აცხადებდა ეკონომიკის მინისტრი.
„გალტ ენდ თაგარტის“ მმართველმა დირექტორმა ოთარ შარიქაძემ განაცხადა, კომპანიამ მოკვლევა 1 კვირის წინ დაიწყო და ამ ეტაპისთვის გარკვეული შედეგები აქვთ; კვლევის პირველი ეტაპის შედეგები კი, საბოლოოდ, მიმდინარე კვირის ბოლოსთვის იქნება მზად.
„ჩვენ ვუყურებთ იმპორტის რიცხვებს, მოვახდინეთ იდენტიფიკაცია გარკვეული დარგების, რომლებშიც იმპორტი მოცულობითია და ვუყურებთ პოტენციალს, თუ როგორ შეიძლება ეს იმპორტი ჩანაცვლდეს ადგილობრივი წარმოებით.
კვლევამ უნდა უპასუხოს შემდეგს: რეალურად ჩვენ გვაქვს რამდენიმე დარგი, სადაც არის იმპორტი, ამ პროდუქტებზე ბაზარზე მოთხოვნა არის და არ გვაქვს ადგილობრივი წარმოება. კითხვა დაისვა - რომელი დარგებია, სადაც ხდება დიდი მოცულობით იმპორტის განხორციელება და შეგვიძლია თუ არა ეს იმპორტი ჩავანაცვლოთ ადგილობრივი წარმოებით იმისთვის, რომ ნაკლები დოლარი გავიდეს უცხოეთში. აქედან გამომდინარე, ვუყურებთ იმპორტის სტრუქტურას და ვახდენთ დარგების იდენტიფიცირებას. პირველ ეტაპზე უკვე გამოიკვეთა 2 მიმართულება, ეს არის: სამშენებლო მიმართულება და სოფლის მეურნეობა და საკვები პროდუქტების წარმოება საქართველოში.
კვლევაზე მუშაობა, დაახლოებით, 1 კვირის წინ დავიწყეთ და ჯერ არ დაგვისრულებია. ამ ეტაპზე ვფიქრობთ, რომ კვლევის პირველადი ნაწილი ამ კვირის ბოლოსთვის მზად უნდა იყოს.
ეს იქნება საწყისი ქვაკუთხედი, რაზეც შეგვიძლია დავაშენოთ მთელი გეგმა. ეს დაგვეხმარება იმაში, რომ ნაკლებად დამოკიდებული გავხდებით უცხოეთზე და მეორე მხრივ, პოტენციალი შეიძლება იყოს დამატებითი კაპიტალი ინვესტიციების მოზიდვისთვის“, - განაცხადა „გალტ ენდ თაგარტის“ მმართველმა დირექტორმა.
