ჩინეთიდან ლოგისტიკის მაღალი ხარჯის გამო ქართველი იმპორტიორები ალტერნატიულ გზებს ეძებენ. როგორც უცხოური გამოცემები იუწყებიან მოსალოდნელია ჩინეთიდან იმპორტის კიდევ უფრო გაძვირება. რამდენიმე თვის წინ იმპორტიორები აცხადებდნენ, რომ ჩინეთიდან 1 კონტეინერის ტრანსპორტირების ფასმა 14000 დოლარს მიაღწია და ახლა ეს მაჩვენებელი 20 000 დოლარამდეა გაზრდილი, რის გამოც იმპორტიორები ჩინეთის ბაზრებს ტოვებენ და ალტერნატიულ გზებს ეძებენ.

ასეთი ბაზრები კი შესაძლოა თურქეთი და ინდოეთი აღმოჩნდნენ, რადგან თურქეთიდან ლოგისტიკის ხარჯი გაცილებით ნაკლებია.

The Times-ის ინფორმაციით, ჩინეთში ენერგეტიკული კრიზისის გამო მსოფლიოში საქონლის დეფიციტი გაჩნდება, რაც პოპულარული საქონლის მიწოდებას შეაფერხებს. ასევე აღნიშნავენ, რომ პრობლემა 2022 წლის ბოლომდე აქტუალური იქნება, რაც საქონლის 10-12%-ით გაძვირებას გამოიწვევს.

გარდა ამისა, სუეცის არხის ადმინისტრაციამ განაცხადა, რომ 2022 წლის 11 თებერვლიდან არხში გავლის საფასური 6%-ით გაიზრდება. რაც სატრანსპორტო ხარჯების ზრდას და შესაბამისად, საქონლის გაძვირებასაც გამოიწვევს.

სტატისტიკის ეროვნული სამსახურის მონაცემებით, ჩინეთი კვლავ რჩება საქართველოს ერთ-ერთ უმსხვილეს სავაჭრო პარტნიორად. აღნიშნულ პერიოდში იმპორტის მოცულობამ ამ მიმართულებით $599.9 მილიონს გადააჭარბა.

საქართველოს ერთ-ერთი უმსხვილესი სავაჭრო პარტნიორი $1.48 მილიარდით თურქეთია, ხოლო $1.14 მილიარდით მეორე ადგილზეა რუსეთი.